ميار طارق تكتب: هو احنا عندنا نقص عاطفي؟

جملة اتقالتلى فجأة وخلتنى اقف افكر شوية وكالعادة اقرر اكتب عنها..

"عشان احنا مجتمع مفتقد للحب"

هل احنا بنفتقد للحب فى حياتنا فعلًا؟ هل جملة عندنا نقص عاطفى دى واقعية؟ هل احنا مش حاسين إيه هو الحب أصلًا أيًا كانت صوره؟

الجملة دى خلتنى اقف افكر شوية كدة، الحب مش بس بين اتنين، الحب ليه صور تانية كتير أوى، حبك لباباك ومامتك، لاخواتك، لقرايبك، لصحابك، لهوايتك، لرياضتك، لحيوانك الأليف، لأى حاجة انت ممكن تكون بتحبها..

الحب كتير أوى ويصعب حصره فعلًا، بس لو جينا نطبق ونحاول نجاوب على الأسئلة اللى فوق دى ونحاول نحصر الموضوع شوية، أحنا ممكن نكون بنفتقد لأنى نوع فيهم من الحب؟ ولا يمكن احنا بنفتقد واحنا مش حاسين؟!

هنا بتبدأ تظهر معضلة تانية، وهى انك ممكن تكون بتفتقد للحب فعلًا بس انت مش حاسس بده، أنت بتتعامل وبقيت مخلى دماغك ماشية على نظام انه فى حب وأقنعتها بده بس يمكن انت مش حاسه، يعنى لما تيجى تتكلم عنه متقدرش، أنت أكيد بتحب باباك ومامتك، بس هل ده عشان هما بس باباك ومامتك وانت بفطرتك وبالغريزة بتحبهم؟ ولا عشان هما أحسن شخصين فى الدنيا ومفيش حد زيهم؟ -وهنا تمامًا بتطبق جملة حسين فهمى فى فيلم مافيا-

طب صحابك.. بتحبهم عشان كبرت لقيت نفسك وسطهم واتعودت عليهم؟ ولا عشان هما غير أى حد وهما اللى بيكملوك فعلًا؟

قرايبك.. عشان رابط القرابة وصلة الرحم بتقول كلمة بحبهم؟ ولا عشان هما السند وبيمثلوا فعلًا كلمة عيلة وانك تلاقى بدل الكتف الواحد اللى تتسند عليه عشرة؟

طب والإنسان اللى قررت تختاره هو وتحبه.. عشان فجأة ومن غير أى مقدمات حسيت ناحيته الإحساس ده؟ ولا عشان هو مختلف وغير أى حد وعنده كتير أوى يخليك تتمسك بيه وتواجه الدنيا كلها عشانه؟

لما هتيجى تجاوب وتختار هيبدأ يبان إحساسك الحقيقى، أصلك لو اخترت الإجابة الأولى على الأسئلة بسرعة وبدون تفكير، أو عشان هى دى الإجابة فعلًا اللى انت حاسسها، يبقى احنا فعلًا مجتمع بيفتقد للحب، أحنا مش عارفين يعنى إيه حب أصلًا، أحنا أقصى تعريف للحب عندنا اننا نحس ناحية ناس بعينهم بالألفة والود واننا عايزين نفضل معاهم فنقرر نفضل وهكذا.. بدون أى أسباب أخرى..

مش غريب تحب باباك ومامتك عشان فطرتك قالتلك كدة، بس يكون ده بس السبب دى الغريبة فعلًا.. أصل أكيد فى أسباب، أكيد هتلاقيك بتوصف مامتك وبتقول حاجات عليها مختلفة تمامًا عن وصفك لأى ست تانية غير ان هى اللى ولدتك أو انك جيت الدنيا لقيتها هى تحديدًا اللى مامتك..

يمكن يكون سؤال ليه هو من أكتر الأسئلة اللى بتحدد حاجات كتير فى حياتنا، الإجابة عليه بتخليك تشوف حاجات كتير يمكن مكنتش بتاخد بالك منها قبل كدة، لو بتعمل الحاجة وانت معندكش أسباب ليها أو مش عارف بتعملها ليه يبقى هى بلا قيمة، يبقى انت ماشى حياتك بلا هدف ولا أى قيمة، لما تيجى تلاقى نفسك حاسس بالحب ناحية حد وانت مش عارف ليه، ومعندكش أى سبب تقدر تقول عشانه انت بتعمل ده ليه يبقى انت مش عارف إذا كان هو ده اللى انت عايزه ولا لأ، يبقى انت مش عارف يعنى إيه حب!!

ساعات كتير مش هتقدر تجاوب وده طبيعى، بس بتلاقى علامات، بيبقى فى تفاصيل قادر تحكيها بس مش قادر تدى إجابة كافية وواضحة.. وهنا بردو بيبان الفرق بين الناس فى تعريفهم للحب..

هنا انت هتبدأ تحتاج تسأل نفسك ليه بتحب، أيًا كان الشخص أو الحاجة اللى انت بتحبها، ولو معرفتش تجاوب أو حتى ملقتش تفاصيل يبقى انت ممكن تكون مبتحبش أصلًا.. يبقى ممكن ده كله يكون مجرد نقص عاطفى وان احنا بنفتقر للحب فعلًا.. عشان عمرنا ما شفناه أصلًا وأى حاجة كنا بنشوفها كانت أشباه حب كنا بنقنع نفسنا بيها.. يبقى مين فينا ممكن يكون حاسس بالحب بجد؟؟؟؟

 

 
*لكل من ترغب في مشاركة الخواطر أو المقالات برجاء التواصل معنا عبر بريد الكتروني: [email protected]

التعليقات